ကမ္ဘာသစ်

သူငယ်ချင်းရေ

    ငါတို့တွေ ကျောင်းပြီးကတည်းက မတွေ့ကြတော့ဘူးနော်၊၊ ကျောင်းတော်ကြီးတုန်းက ငါတို့တွေ အိပ်မက်တွေကိုယ်စီနဲ့ ဘဝအတွက် အုတ်မြစ်ကိုယ်စီ ချခဲ့ကြတယ်၊၊ တချို့တွေလဲ ကိုယ့်လမ်းကြောင်းပေါ် ကိုယ်စီလျှောက်လို့။ မမျော်လင့်ပဲနဲ့ ဘဝဆိုတဲ့ ပင်လယ်ကြီးက ငါတို့အတွက် ကျယ်ပြန့်လွန်းနေတယ်၊၊
    သူငယ်ချင်းရေ မင်းမှတ်မိသေးလား၊၊ ငါတို့တွေ မွေးရပ်မြေ အတွက် အိပ်မက်ကိုယ်စီ မက်ခဲ့ကြတယ်လေ၊၊ မင်းဖြစ်ချင်ခဲ့တဲ့ အိပ်မက်တွေကို ငါအခုထိမှတ်မိနေတုန်းပဲ၊၊ ဆယ်ကျော်သက် စိတ်ကူးတွေနဲ့ ငါတို့တတွေ လောကကြီးကို လှပသွားအောင် ဆေးရောင်စုံ ချယ်ခဲ့ကြတယ်၊၊
လောဘဇောတိုက်တဲ့ လူတွေအကြောင်း ငါတို့တွေ ဝိုင်းပြီးရှုံ့ချခဲ့ကြတယ်လေ၊၊ အတ္တကြီးတဲ့ လူ့ငနဲတွေရဲ့ စိတ်ဓာတ်ကို ငါတို့တတွေ အံ့သြခဲ့ကြသေးတယ်၊၊
    လောကကြီးက ငါတို့ထင်ထားတာထက် ပိုပြီးတော့ ရှုပ်ထွေးနေတယ်၊၊ ရံဖန်ရံခါကြတော့ ငါတို့ထင်ထားတဲ့ မှားယွင်းမှုတွေက လုပ်သင့်လုပ်ထိုက်တာတွေတဲ့၊၊ ငါတို့တွေအမြဲ ပြောဖြစ်ခဲ့တဲ့ ကိုယ်ခြင်းစာတရားက ပျော့ညံ့မှုတဲ့၊၊ သူငယ်ချင်းရယ် မိုးခါးရေတွေသောက်နေတဲ့ လူတွေကြားမှာ ငါတို့ရဲ့ သစ္စာတရားက အရောင်မလက်တော့တာ အမှန်ပဲ၊၊
    ဖျားနာနေတဲ့ ငါတို့ရဲ့community တွေမှာ အဆိပ်ကို ဆေးလို့ထင်နေကြတုန်းပဲ၊၊ ဂရုဏာတရား ဆိုတာ ဆေးခါးကြီးဖြစ်မှန်းမသိ ဖြစ်လာနေပြီ သူငယ်ချင်း၊၊ အဖြူရောင်ချယ်ခဲ့တဲ့ ငါတို့တတွေရဲ့ နှလုံးသားတွေ တောင့်ခံနိူင်ဖို့ ငါမျော်လင့်တယ်၊၊ အသစ်အသစ်တွေနဲ့ ရုပ်ဝတ္ထုကြားမှာ ငါတို့တွေ နစ်မွန်းမသွားဖို့ လိုတယ်သူငယ်ချင်း၊၊
    ငါတို့တတွေကို ဒီလောကကြီးကလိုအပ်တယ် ဆိုတာမေ့မသွားနဲ့၊၊ ငါတို့တွေမက်ခဲ့ဖူးတဲ့ အိပ်မက်တွေက အဓိပ္ပါယ်လေးနက်တယ် မှန်ကန်တယ်ဆိုတာ တစ်နေ့တော့ မင်းတို့ငါတို့တွေ မြင်ရမှာပါ၊၊ လှိုင်းကြမ်းနေတဲ့ ဒီအချိန်မှာ ငါတို့တွေ ဟန်ချက်ညီဖို့လိုတယ်၊၊
    သူငယ်ချင်း ငါတို့တွေရဲ့ ကမ္ဘာသစ်ကို အားမှန်အပြည့်နဲ့ တည်ဆောက်ချိန်မှာ ခက်ခဲပင်ပမ်းနိူင်ပေမယ့် မင်းစိတ်ဓာတ်မကျဖို့ ငါမျော်လင့်တယ်၊၊ နေရောင်ခြည်နဲ့ နွေးထွေးတဲ့ ကမ္ဘာသစ်ကို ငါတို့တွေမြင်ယောင်ရင်း ကြိုးစားသွားကြမယ်၊၊