အရေးကြီးဆုံး သင်ခန်းစာ

သမီးမူလတန်းတက်နေတဲ့ နှစ်တွေမှာ သမီးရဲ့ မေမေကို သူငယ်ချင်းတွေရဲ့ မေမေတွေနဲ့ စပြီးတော့ နှိုင်းယှဉ်တတ်လာခဲ့တယ်၊၊ အထူးသဖြင့်ကတော့ သမီးရဲ့ အချစ်ဆုံးသူငယ်ချင်း တစ်ဖနီ ရဲ့မေမေနဲ့ သမီးရဲ့မေမေကို ခဏခဏ နှိုင်းယှဉ်ကြည့်မိတာပါပဲ၊၊

တစ်ဖနီ ကျောင်းကိုလာတဲ့အခါတိုင်း နောက်ဆုံးပေါ် အကျႌ ဒီဇိုင်းဆန်းဆန်းလေးတွေနဲ့ အကောင်းဆုံးမိတ်ကပ်တွေ အမြဲတမ်းလိမ်းလာတတ်ပါတယ်၊၊ သူ့ရဲ့ ဆံပင်ပုံစံတွေကလဲ တစ်နေ့တစ်မျိုး မရိုးရလောက်အောင်ပါပဲ၊၊ သူမရဲ့ တစ်ပတ်တာ ကုန်ကျစရိတ်ဟာ ကျူးဘားမှာရှိတဲ့ မိသားစုတစ်စုကို တစ်နှစ်စာလောက် ကျွေးထားနိူင်ပါတယ်၊၊ ပြီးတော့ သူမဆီမှာရှိတဲ့ လက်ဝတ်ရတနာတွေကလဲ သမီးတို့ အိမ်နောက်ဖေးမှာပေါက်နေတဲ့ မြက်ပင်တွေထက်တောင် ပိုများပါသေးတယ်၊၊ သူမဟာ ဝတ်တဲ့ဝတ်စုံနဲ့ ဖိနပ်ဆင်တူ စီးတတ်သလို ပိုက်ဆံအိပ်သေးသေးလေးတွေကိုလဲ အဝတ်အစားနဲ့လိုက်အောင် အမြဲတမ်း ဆင်ယင်တတ်ပါတယ်၊၊ ကျောင်းမှာဆိုရင်လည်း သူမနောက်မှာ ဝတ်ကောင်းစားလှတွေနဲ့လူတစ်အုပ်ကြီးကို အမြဲတွေ့ရလေ့ရှိသလို ကျောင်းသား ကျောင်းသူတွေကြားမှာ သိပ်ပြီး ပေါ်ပြူလာဖြစ်တဲ့ တစ်ဖနီပါ၊၊


ပြီးတော့ တစ်ဖနီရဲ့မေမေဟာ သူမကို ရော့ခ်ဂီတပွဲတွေ သွားခွင့်ပြုထားပါတယ်၊၊ ကောင်လေးတွေနဲ့ချည်းပဲလဲ အပြင်သွားလျှောက်လည်ခွင့် ပေးထားပါသေးတယ်၊၊ ပြီးတော့ သူငယ်ချင်းတွေနဲ့ ညအိပ်ဖို့လဲ ခွင့်ပြုပြန်တယ်၊၊ အဲဒီသုံးခုက သမီးမေမေ သမီးကို ဘယ်တော့မှ ခွင့်မပြုမယ့်အရာတွေပေါ့၊၊ တစ်ဖနီရဲ့မေမေက တစ်ဖနီဘာပဲလုပ်လုပ် ငွေကြေးနဲ့ပြည့်စုံအောင် ဖြည့်ဆည်းပေးတဲ့ အချိန်မှာ သမီးမေမေကတော့ သမီးရဲ့ အမှတ်တွေကောင်းဖို့ ပြီးတော့ အိပ်ရာဘယ်လိုသိမ်းရမယ်ဆိုတာတွေပဲ ဂရုစိုက်နေပါတယ်၊၊ တစ်ဖနီနဲ့ အတူတူ ကုန်တိုက်သွားဖြစ်တဲ့အခါတိုင်း သူမက ဒေါ်လာ ၁၀၀ လောက်ကိုဂရုမစိုက်ပဲ သုံးလိုက်တဲ့အခါမှာ သမီးကတော့ လက်ထဲမှာ အကြွေစေ့တွေကို ကျစ်ကျစ်ပါအောင် ဆုပ်ကိုင်ထားခဲ့ရတယ်၊၊

သမီးလိုချင်တာတွေ မရတဲ့အခါတိုင်း တစ်ဖနီရဲ့မေမေဟာ သမီးရဲ့မေမေဖြစ်လိုက်ရင် ဘယ်လောက်များကောင်းလိုက်မလဲလို့ အမြဲတမ်း ညည်းတွားမိတယ်၊၊ အဲဒီလို ပြောလိုက်တိုင်း မေမေကတော့ “ သနားစရာကောင်းလိုက်တဲ့ တစ်ဖနီ“ လို့ အမြဲပြောတယ်၊၊

“မေမေ တစ်ဖနီ ဒေါ်လာ ၂၀၀ တန်တဲ့ ဝတ်စုံဝယ်လိုက်ပြီ“
“သနားစရာကောင်းလိုက်တဲ့ တစ်ဖနီ“
“ မေမေ တစ်ဖနီက သူ့အိပ်ခန်းကို အလှဆင်ဖို့ ဒီဇိုင်နာတစ်ယောက် ငှားလိုက်ပြီ“
“သနားစရာကောင်းလိုက်တဲ့ တစ်ဖနီ“

“မေမေ တစ်ဖနီက သူ့အိပ်ခန်းထဲမှာ တီဗီအကြီးကြီးနဲ့ ရုပ်ရှင်အသံလွှင့်တဲ့ စနစ်တပ်ထားပြီ“
“သနားစရာကောင်းလိုက်တဲ့ တစ်ဖနီ“

သမီးရဲ့ မေမေ့ကို သမီး တကယ်နားမလည်နိူင်တော့ပါဘူး၊၊ တကယ်တော့ မေမေ သနားရမယ့်သူက တစ်ဖနီ မဟုတ်ပဲ သမီးဖြစ်ရမှာ၊၊ တစ်ဖနီက လိုတာရနေတဲ့ချိန်မှာ
ဘာမှမရှိတဲ့ သမီးကို မေမေက သနားရမှာ၊၊ ခုတော့ ပြောင်းပြန်၊၊ မေမေက တစ်ဖနီကို သနားနေတယ်၊၊ သမီး နားမလည်နိူင်တော့ဘူး၊၊

တစ်ဖနီကို သနားစရာကောင်းလိုက်တာလို့ မေမေအမြဲတမ်းပြောနေတာ သမီးသည်းမခံနိူင်တော့တဲ့နေ့မှာ မေမေ့ကို သမီးပြန်ပြောလိုက်ပါတယ်၊၊
“ မေမေက တစ်ဖနီကို သနားစရာကောင်းလိုက်တာလို့ပြောတယ် တကယ်တော့ သူက ကံကောင်းတာပါ မေမေ ဒီလောကကြီးမှာ သူမရနိူင်တာ မရှိဘူး အဲဒါကို မေမေက သူ့ကို သနားနေတယ် သမီးနားမလည်နိူင်တော့ဘူး“
အဲဒီစကားတွေကို ရှိုက်ကြီးတငင်ငိုရင်းနဲ့ မေမေ့ကို ပြောပစ်လိုက်တယ်၊၊

သမီးငိုနေတဲ့နားကို မေမေဖြည်းဖြည်းလေးလာထိုင်ပြီး တိုးတိုးလေး စကားပြောတယ်၊၊
“ မေမေ တကယ်ပဲ တစ်ဖနီအတွက် ဝမ်းနည်းတယ် သမီးလေး ဘာကြောင့်လဲဆိုတော့ သမီးသင်ကြားလေ့လာနေတဲ့ သင်ခန်းစာကို တစ်ဖနီက ဘယ်တော့မှ သင်ကြားဖို့ အခွင့်အရေးရှိမှာ မဟုတ်လို့ပဲ“

သမီးငိုနေရင်းနဲ့ တချက်ရှိုက်လိုက်ပြီး “ မေမေ ဘာတွေပြောနေတာလဲ“ လို့မေးလိုက်တယ်၊၊
ဝမ်းနည်းတဲ့မျက်လုံးတွေနဲ့ မေမေလေ သမီးကို ကြည့်ရင်းပြောတယ်၊၊

“ သမီး တစ်နေ့ကျရင် တစ်ဖနီဟာ အရာတစ်ခုကို အရမ်းကိုလိုချင်လာလိမ့်မယ် ဒါပေမယ့် အဲဒါကို သူမရနိူင်ဘူးဆိုတာ သူသဘောပေါက်လာလိမ့်မယ် ဘဝဆိုတာ အမြဲတမ်း မပြောင်းလဲပဲ ရှိမနေနိူင်ဘူး သမီး… တစ်ဖနီရဲ့ မေမေဟာ တစ်ဖနီနားမှာ သူလိုသမျှအမြဲတမ်း ဝယ်ပေးဖို့ အမြဲရှိမနေနိူင်ဘူး....ပြီးတော့ငွေဆိုတာ အရာတိုင်းကို ဝယ်လို့မရနိူင်ဘူး....မေမေ့ရဲ့ ဒီသမီးလေးကို ရှိသမျှငွေတွေ အကုန်မသုံးဖြစ်ဖို့ ဆုံးမမဲ့ မေမေရှိတယ်.. ဒီတော့ သမီးလေးက ငွေကို ဘယ်လိုချွေတာသုံးစွဲရမယ်ဆိုတာ နားလည်လာမယ် တစ်ဖနီကတော့ နားလည်မှာ မဟုတ်ဘူး….ကိုယ်လိုချင်တဲ့အရာအတွက် အလုပ်ကြိုးစားပြီး  ရယူရမယ်ဆိုတာ သမီးလေးကတော့ သဘောပေါက်မယ် ဒါပေမယ့် တစ်ဖနီကတော့ သဘောပေါက်မှာ မဟုတ်ဘူး…..တစ်ဖနီကြီးလာတဲ့ တစ်နေ့ အိပ်ရာကနိုးလာတဲ့အခါ သူ့မေမေရဲ့ ငွေတွေ အားလုံးသုံးလို့ကုန်သွားတဲ့အချိန်ကျရင် သူ့ဆီမှာ သမီးရဲ့မေမေလိုမျိုး မေမေရှိခဲ့ရင် ကောင်းမယ်လို့ တွေးမိလာလိမ့်မယ်.....ဘဝရဲ့ သင်ခန်းစာတွေ မျှော်လင့်ချက်တွေဆိုတာ ရော့ခ်ဂီတပွဲတွေ နာမည်ကြီးအဝတ်အစားတွေထက်ပိုပြီး တန်ဖိုးရှိတယ် သမီး“

သမီးနားလည်လိုက်ပါပြီ၊၊ အချိန်တွေယူခဲ့ရပေမယ့် နောက်ဆုံးတော့ မေမေ့ရဲ့ သင်ခန်းစာကို တကယ်ပဲနားလည်လိုက်ပါပြီ၊၊ တစ်နေ့ကျရင် သမီးဟာ ကိုယ့်ကိုယ်ကို ကာကွယ်စောင့်ရှောက်နိူင်တဲ့ အမျိုးသမီးအဖြစ် ဂုဏ်ယူရမယ်ဆိုတာ မြင်ယောင်မိပါတယ်၊၊ အဲဒီအခါကျရင် ကိုယ့်ကိုယ်ကို ဘယ်လိုစောင့်ရှောက်ရမှန်းမသိတဲ့လူတွေကို သနားမိမှာပါ၊၊
“ သနားစရာကောင်းလိုက်တဲ့ တစ်ဖနီရယ်“


The most important lesson ကို နားလည်သလို ဘာသာပြန်ပါသည်၊၊