Thanksgiving ဘယ်ကစ

နိုဝင်ဘာလထဲမှာ  Halloween ခေါ် သရဲပွဲတော် ပြီးတာနဲ့ Thanksgiving ပွဲတော်နွဲဖို့အတွက်  ပြင်ဆင်နေကြပါပြီ၊၊ ကျနော်ဟာ ခရစ်ယာန်ဘာသာဝင် အဖြစ် ကြီးပြင်းလာခဲ့တာမို့ Thanksgiving ပွဲတော်ဆိုတာ ကျနော်ကလေးဘဝကတည်းက ပါဝင်ဆင်နွဲခဲ့ဖူးတဲ့ ရင်းနှီးနေတဲ့ ပွဲတော်တစ်ခုပါ၊၊ မြန်မာပြည်မြောက်ဖျားပိုင်းမှာ နိုဝင်ဘာလဆိုရင် လယ်ယာရိတ်သိမ်းမှုတွေ အပြီးသတ်ကြတာမို့ ကောက်သစ်စားပွဲတော် ကျင်းပကြပါတယ်၊၊ မိမိလယ်ယာ တောင်ယာတွေကနေထွက်တဲ့ အသီးအနှံတွေ ဘုရားရှိခိုးကျောင်းကို ယူဆောင်လာကြပြီး မိတ်ဆွေများနဲ့ တစ်နှစ်တာလုံးအတွက် ဘုရားရဲ့ဂုဏ်ကျေးဇူးတော်ကို အတူတကွ ချီးမွမ်းကြတာပါ၊၊ လွယ်လွယ်ကူကူ Thanksgiving ဆိုပြီး သင်းအုပ်ဆရာတွေက ပြောလေ့ပြောထရှိပါတယ်၊၊

အမေရိကားမှာတော့ Thanksgiving Day ဟာ နိူင်ငံတော်ပိတ်ရက်ဖြစ်ပါတယ်၊၊ ကျောင်းတွေ လေးရက်ဆက်တိုက်ပိတ်ကြပြီး  ကလေးတွေ  နှင်းတောထဲမှာ ပျော်ရွှင်စွာ ဆော့ကစားနိူင်တဲ့ အချိန်လဲဖြစ်ပါတယ်၊၊ နှင်းမုန်တိုင်းမကျဘူး ဆိုရင်ပေါ့လေ၊၊ အမေရိကန်လူမျိုးတွေမှာ Thanksgiving နဲ့ပတ်သက်ပြီး ရှည်လျားခိုင်မာတဲ့ သမိုင်းကြောင်းရှိခဲ့ပါတယ်၊၊

၁၆၂၀ ခုနှစ်မှာ အင်္ဂလန်နိူင်ငံ Plymouth လို့ခေါ်တဲ့ မြို့လေးကနေပြီးတော့ မေဖလားဝါး လို့ အမည်တွင်တဲ့ လှေတစ်စင်းဟာ အမေရိကတိုက်ရဲ့ မန်ဆာချူဆက် ဒေသကို ဆိုက်ကပ်ရောက်ရှိလာခဲ့တယ်၊၊
လှေပေါ်မှာ ပါလာတဲ့ ခရီးသွာ ၁၀၂ ယောက်ဟာ မိမိယုံကြည်ရာကို လွတ်လပ်စွာကိုးကွယ်ခွင့်ရဖို့အတွက်နဲ့ နယ်မြေအသစ်မှာ အခြေချဖို့အတွက် နေရပ်ကိုစွန့်ခွာလာကြသူများဖြစ်ကြတယ်၊၊ အဲဒီပထမဦးဆုံး အခြေချခဲ့တဲ့လူတွေကို ဒီကနေ့အချိန်အခါမှာတော့  " Pilgrims " လို့ ခေါ်ဆိုကြပါတယ်၊၊

Pilgrims တွေဟာ အမေရိကတိုက်ရဲ့အေးခဲလှတဲ့ ပထမဦးဆုံးဆောင်းရာသီကို ဖြတ်သန်းပြီးတဲ့နောက်မှာတော့ နဂိုရှိတဲ့လူဦးရေထဲက တစ်ဝက်နီးပါးဟာ အစာရေစာပြတ်လပ်မှု၊ ရာသီဥတု ကြမ်းတမ်းမှု ပြီးတော့ ရောဂါအသစ်အဆန်းတွေကြောင့် သေဆုံးသွားခဲ့ကြပါတယ်၊၊

မတ်လ  ရောက်တဲ့အခါမှာ Pilgrims တွေဟာအံ့သြဝမ်းသာစရာကောင်းတဲ့ အဖြစ်အပျက်တစ်ခုနဲ့ကြုံဆုံရပါတော့တယ်၊၊အဲဒါကတော့ အင်္ဂလိပ်စကားပြောဆိုတတ်တဲ့ ကနဦး အမေရိကန် လူနီတစ်ဦး Pilgrims တွေ ဆီကို ရောက်လာတာပဲဖြစ်တယ်၊၊  ဒီလူနီလေးဟာ အင်္ဂလိပ်ရေတပ်ဗိုလ်တစ်ဦးရဲ့ ဖမ်းဆီးမှုကို ခံခဲ့ရပြီး ကျွန်အဖြစ် အင်္ဂလန် ကို ရောင်းစားခံခဲ့ရပြီးနောက် ဘုန်းကြီးတစ်ပါးက ကယ်တင်ခြင်းကို ခံခဲ့ရပါတယ်၊၊ အဲဒီနောက်သူဟာ ခရစ်ယာန်ဘာသာကို သက်ဝင်ယုံကြည်သွားပြီး မိမိရဲ့ နေရပ်ဒေသကို ပြန်လာနိူင်ခဲ့တာ ဖြစ်တယ်၊၊ 

ဒီလူနီလေးရဲ့ အကူအညီနဲ့ Pilgrims တွေဟာ လယ်ယာဘယ်လိုစိုက်ပျိုးရမယ်၊ မြစ်ထဲမှာငါးဘယ်လိုဖမ်းရမယ်ဆိုတာတွေ၊ အဆိပ်ရှိတဲ့ အပင်တွေကို ခွဲခြားသိလာခဲ့ပါတယ်၊၊ ပထမဦးဆုံး လယ်ယာ ရိတ်သိမ်းပြီးတဲ့နောက် လူနီမျိုးနွယ်စုတွေနဲ့အတူ စားသောက်ပွဲကြီး ကျင်းပခဲ့ပါတယ်၊၊ အဲဒီအခါတုန်းက Thanksgiving လို့ တော့  အမည်မခေါ်ခဲ့ပေမယ့် ဒါဟာ Thanksgiving ပွဲတော်များရဲ့ ပထမဦးဆုံး ပွဲတော် ဖြစ်ခဲ့ပါတယ်၊၊

အဲဒီနောက်ပိုင်း နှစ်ပေါင်းနှစ်ရာကျော်တဲ့အထိ လူမျိုးစုတွေနဲ့ ပြည်နယ်အစိုးရတွေဟာ ကိုယ့်နည်းကိုယ့်ဟန်နဲ့ Thanksgiving ပွဲတော်ကို ကျင်းပခဲ့ကြပါတယ်၊၊ 1863 ခုနှစ် သမ္မတ အီဘရာဟင်လင်ကွန်းလက်ထက်မှာတော့ Thanksgiving Day ကို နိူင်ငံတော်ရဲ့ ပိတ်ရက်တစ်ရက်အဖြစ် သတ်မှတ်ပေးခဲ့ပါတယ်၊၊

ဒါလေးကတော့ Thanksgiving ရဲ့ အမှတ်သင်္ကေတ ကြက်ဆင် ဖြစ်ပါတယ်၊၊  အဓိက အစားအစာအဖြစ် နေရာယူပြီး ဘေးမှာတော့ ဘယ်ရီကိတ်တို့ အချိုတည်းစရာတွေနဲ့ ဝန်းရံထားပြီး Thanksgiving Dinner ကို ပြင်ဆင်ကြပါတယ်၊၊

အားလုံးပဲပျော်ရွှင်စရာကောင်းတဲ့ ရုံးပိတ်ရက်လေး ဖြစ်ပါစေ :)