ဒီကနေ့ ကျွန်မဆိုတာ ( Salma Hayek )

ကျွန်မဘဝမှာ အားကျရတဲ့  မင်းသမီး ဒါမှမဟုတ် ဖြစ်ချင်ခဲ့တဲ့ စိတ်ကူးထဲက လေးစားအားကျရတဲ့သူရှိလားလို့ ပရိတ်သတ်တွေ မကြာခဏမေးကြတယ်၊၊ လွန်ခဲ့တဲ့နှစ်အနည်းငယ်တုန်းကဆိုရင် ဒီမေးခွန်းကိုဘယ်လိုဖြေရမယ်မှန်း ကျွန်မမသိခဲ့ပါဘူး၊၊ ဒါပေမယ့် ဒီမေးခွန်းကိုပဲ တလောတုန်းက လူတစ်ယောက် ပြန်မေးတဲ့အခါမှာ ကျွန်မကိုယ်ကျွန်မ နားလည်သွားခဲ့တယ်၊၊ ကျွန်မဘဝထဲမှာ ကျွန်မကိုအများဆုံးတွန်းအားပေးတဲ့သူတွေက ကျွန်မရဲ့မိသားစုဝင် အမျိုးသမီးတွေ ဖြစ်တယ်၊၊ အဲဒီအမျိုးသမီးတွေဟာ သူတို့ဘဝမှာ ဖြစ်နိူင်ခွင့်ရှိပေမယ့် စွန့်လွှတ်ခဲ့ရတဲ့သူတွေ၊ တခြားသူများထက် သာလွန်တဲ့အရည်အချင်းရှိပေမယ့် သူတို့ရဲ့ အိပ်မက်တွေ ဘယ်တော့မှ အကောင်အထည် ပေါ်မလာခဲ့တဲ့သူတွေဖြစ်တယ်ဆိုရင် စာဖတ်သူအံ့သြမိမလား၊၊

ကျွန်မရဲ့အဘွားဆိုရင် အင်မတန်မှထက်မြက်သူဖြစ်ပြီး အကြောက်တရားကင်းမဲ့တဲ့ အမျိုးသမီးတစ် ဦးဖြစ်တယ်၊၊ သူမဟာ ကဗျာတွေသီချင်းတွေရေးစပ်နိူင်သူဖြစ်တယ်၊၊  ပြီးတော့ သူမဟာ ဓာတုဗေဒ၊ သမိုင်းဘာသာရပ်နဲ့  ဆေးပညာကို စိတ်ဝင်စားသူတစ်ဦးလဲဖြစ်ပြန်တယ်၊၊ မက်ဆီကို မှာရှိတဲ့ သူမရဲ့လူတွေအတွက် သူမပိုင်ဆိုင်တဲ့ ခြံကြီးထဲမှာ ကျန်းမာရေးစောင့်ရှောက်မှုတွေ ပြုလုပ်ပေးတယ်၊၊ ဒါတင်မက ကိုယ်ဝန်သည်များအတွက် ဝမ်းဆွဲဆရာမလဲ လုပ်ပါသေးတယ်၊၊ ဒီတော့ သူမဟာ သူမဖြစ်ချင်ရာဖြစ်ဖို့ လိုအပ်တဲ့အရည်အချင်းရှိသူလို့ ပြောနိူင်တယ်၊၊ ဒါပေမယ့် ဒီအဖြစ်အပျက်တွေဖြစ်ပျက်ခဲ့တဲ့   အချိန်ဟာ 1930 ပြည့်နှစ်များ တနည်းအားဖြင့်ဆိုရရင် မိဘတွေဟာ မိမိသားသမီးများကို အတင်းအကြပ် အိမ်ထောင်ချပေးကြတဲ့ အချိန်တွေဖြစ်ခဲ့တယ်၊၊ ဒီလိုနဲ့ အဘွားဟာ မိဘတွေစီစဉ်ပေးတဲ့ အိမ်ထောင်တစ်ခုအောက်မှာ ခြေချုပ်မိသွားခဲ့တယ်၊၊ ဒါပေမယ့် အဘွားဟာ စိတ်ဆုံးဖြတ်ချက်ချပြီး သူမခင်ပွန်းသည်နဲ့ ကွာရှင်းပြီး Mexico City ကို ထွက်လာခဲ့တယ်၊၊  မမျှော်လင့်ပါပဲနဲ့ မြို့ကြီးပြကြီးမှာတောင် အမျိုးသမီးတွေကို နှိမ့်ချဆက်ဆံကျလို့   အဘွားအတွက် လုပ်ငန်းစတင်ဖို့ ခက်ခဲခဲ့ရတယ်၊၊



ကျွန်မ မေမေဆိုလို့ရှိလည်း သူမရဲ့အိပ်မက်တွေကို စွန့်လွတ်ခဲ့ရတဲ့သူတစ်ယောက် ဖြစ်တယ်၊၊  မေမေဟာ အဆိုတော်တစ်ဦး ဖြစ်ချင်ခဲ့တယ်၊၊ ဒါပေမယ့် သူမကြီးပြင်းရာ ပတ်ဝန်းကျင်မှာ အဆိုတော်ဆိုတာ လူအထင်သေးတဲ့ အသက်မွေးဝမ်းကျောင်းတစ်ခုဖြစ်တယ်၊၊ ဒီလိုနဲ့ပဲ မေမေဟာ ငါ့အသံ သိပ်မကောင်းပါဘူးလို့ ကိုယ့်ဖာသာပြောရင်း Music School သွားပြီး လေ့လာသင်ကြားရမယ့်အစား အိမ်ထောင်ပြု သားမွေးပြီး သူမအိပ်မက်ကို  အဆုံးသတ်ပစ်ခဲ့တယ်၊၊ မေမေဟာ  အသက်ကြီးပိုင်းရောက်မှပဲ ဂီတနဲ့ပတ်သက်ပြီးလေ့လာခဲ့တယ်၊၊သူမရဲ့ပင်ကိုယ်အသံဟာ စောစောစီးစီးသာ လေ့လာသင်ကြားခဲ့ရမယ်ဆိုရင် မက်ဆီကိုရဲ့ Maria Callas( မက်ဆီကန်နာမည်ကြီး အဆိုတော် )  နောက်တစ်ယောက် ဖြစ်နိူင်ဖွယ်ရှိပါတယ် ၊၊

ကျွန်မ သရုပ်ဆောင်လောကထဲကို စဝင်လာခဲ့တုန်းက လူတွေက ကျွန်မသရုပ်ဆောင်ကောင်းတစ်ယောက် မဖြစ်နိူင်ဘူးလို့ ခဏခဏပြောခဲ့ကြပါတယ်၊၊ ဒါပေမယ့် ကျွန်မကိုယ် ကျွန်မ အမြဲအားပေးခဲ့ပါတယ်၊၊ အဘွားနဲ့ အမေ့ရဲ့  အတွေ့အကြုံတွေဟာ ကျွန်မဘဝကို ဂုဏ်ယူစွာ လွှမ်းခြံုထားပါတယ်၊၊ သူတို့နှစ်ယောက်အကြောင်း တွေးမိလိုက်တိုင်း ကျွန်မဘဝရဲ့ သဘောထားအမြင်တွေကို ခွန်အားတွေဖြစ်စေပါတယ်၊၊  ခုဆိုရင် ကျွန်မရဲ့ သမီးလေးရဲ့ ဖြစ်ချင်တဲ့အိပ်မက်တွေကို တွန်းအားပေးဖို့ အသင့်ဖြစ်နေပါပြီ၊၊  သမီးလေးကို ဘာလုပ်ရမယ်  ဘာဖြစ်ရမယ်ဆိုပြီး ကျွန်မ တင်းကြပ်မှာမဟုတ်ပါဘူး၊၊  ကျွန်မသမီးလေးကို အိပ်မက်တွေအကြီးကြီးမက်ပြီး သူမလုပ်နိူင်တယ်ဆိုတာ ယုံကြည်စိတ်ချမှုရှိတဲ့ သူတစ်ယောက်ဖြစ်စေချင်ပါတယ်၊၊

ခုချိန်မှာ ကျွန်မဟာ မင်းသမီးတစ်လက်အဖြစ်ရော မိခင်တစ်ဦး အဖြစ်ပါ အောင်မြင်တဲ့သူတစ်ယောက်ဖြစ်ချင်ပါတယ်၊၊ ဘာကြောင့်လဲဆိုတော့ ကျွန်မဟာ အရည်အချင်းရှိရဲ့သားနဲ့  အိပ်မက်တွေအကောင်အထည်ဖော်ခွင့်မရခဲ့တဲ့ မိန်းမသားတွေရဲ့ ဘဝကို ကိုယ်စားပြုချင်လို့ပါ၊၊ သူတို့တွေရဲ့ ဂုဏ်သိက္ခာ၊ သတ္တိတွေနဲ့ ထက်မြက်မှုတွေကြောင့် ကျွန်မဘဝဟာ ပိုပြီးတင့်တယ်လာခဲ့တာပါ၊၊ ဒါကြောင့်မို့ သူတို့တွေအားလုံးဟာ ကျွန်မဘဝရဲ့ အစိတ်အပိုင်းတွေဖြစ်တယ်၊၊ ကျွန်မရဲ့ အောင်မြင်မှုဟာ သူတို့တွေအတွက် အောင်မြင်မှုတစ်ခုလဲ ဖြစ်ပါတယ်၊၊

စာရေးသူ Salma Hayek ဟာ မက်ဆီကိုဖွား ဟောလိဝုဒ် မင်းသမီး ဖြစ်ပါတယ်၊၊